Desde hoxe está aberto o prazo de inscrición para #SilverBullet17, o I Congreso de Xestión de Proxectos Software, que terá lugar o 11 de maio na Cidade da Cultura, organizado polo Colexio Profesional de Enxeñaría Técnica en Informática de Galicia, CPETIG, e a Axencia de Modernización Tecnolóxica de Galicia, Amtega.
A cita vai ser un foro de discusión e debate aberto a empresas, profesionais vinculados á xestión de proxectos de software, expertos, investigadores e docentes implicados na formación de futuros profesionais nesta área. #SilverBullet17 propiciará a adquisición de habilidades de comunicación, xestión de recursos humanos e liderado, amais de contribuír a amosar as tendencias metodolóxicas no eido da xestión de proxectos software.
Intervirán como relatores algúns dos máis relevantes profesionais do panorama actual. Na sesión de mañá tomarán a palabra José Luis Iparraguirre, director de IAL Software Engineering; Carlos González Jardón, consultor de Xestión de Proxectos en Tecnocom; e Javier Garzás, mentor áxil e experto en xestión de proxectos e equipos; para rematar cunha mesa de debate moderada por Susana Gómez Carnero, CEO en Origami Soluciones e directora executiva de BNI Galicia. Os relatores previstos para a sesión de tarde son Javier Cebreiros, socio do espazo de innovación social Impact Hub Vigo e da empresa InfoJC; e Jaume Gurt, director de Organización e Desenvolvemento de Persoas en Schibsted Spain, que xestiona os portais Infojobs, Fotocasa, Vibbo, Coches.net e MilAnuncios.